Тегін медициналық көмек және медициналық сақтандыру туралы қысқаша. Сомалар мен қағидалар жыл сайын өзгереді: өзекті деректер Әлеуметтік медициналық сақтандыру қорының (ӘМСҚ) сайтында — msqory.kz.
ТМККК мен МӘМС: айырмашылығы неде
- ТМККК (тегін медициналық көмектің кепілдік берілген көлемі) сақтандыруы жоқ болса да барлық азаматтарға көрсетіледі: жедел және шұғыл көмек, бекітілген емханадағы көмек (учаскелік дәрігер, профилактика, екпелер, скринингтер), әлеуметтік мәні бар және айналадағыларға қауіпті ауруларды емдеу, паллиативтік көмек, заңда көзделген жағдайларда дәрі-дәрмек.
- МӘМС (міндетті әлеуметтік медициналық сақтандыру) — сақтандырылғандарға ТМККК-дан тыс көмек: бейінді мамандардың кеңесі, диагностика, созылмалы аурулар кезінде динамикалық бақылау, стационарда және күндізгі стационарда жоспарлы емдеу, жоғары технологиялық көмек, оңалту, жекелеген санаттарға стоматологиялық көмек, тізбелер бойынша дәрі-дәрмек.
Толық тізбелер — Үкімет қаулыларында: ТМККК тізбесі және МӘМС жүйесіндегі медициналық көмек тізбесі. Түсіндірме — ӘМСҚ сайтында.
2026–2028 жылдарға арналған ТМККК және МӘМС аясындағы медициналық көмектің түрлері, нысандары мен шарттары, сондай-ақ оның қолжетімділік өлшемшарттары кепілдіктер бағдарламасында белгіленген (ҚР Үкіметінің 2025 жылғы 9 қазандағы № 840 қаулысы, 2026 жылғы 1 қаңтардан бастап қолданылады).
Сақтандырылғаныңызды қалай тексеруге болады
- ӘМСҚ сайтында ЖСН бойынша — мәртебені тексеру;
- Qoldau 24/7 мобильді қосымшасында немесе ӘМСҚ-ның SaqtandyrýBot Telegram-ботында;
- egov.kz порталында немесе банкіңіздің қосымшасында;
- Бірыңғай байланыс орталығы: 1414.
Кімдер үшін жарналарды мемлекет төлейді
Азаматтардың 16 санаты үшін МӘМС жарналарын мемлекет төлейді. Олардың ішінде: 18 жасқа дейінгі балалар; зейнеткерлер; мүгедектігі бар адамдар; жұмыс істемейтін жүкті әйелдер; 3 жасқа дейінгі баласы бар жұмыс істемейтін ата-ана және бала күтімі бойынша демалыстағылар; күндізгі оқу нысанындағы студенттер; «Алтын алқа», «Күміс алқа» алқаларымен марапатталған көп балалы аналар; мүгедектігі бар баланы немесе бірінші топтағы мүгедектігі бар адамды күтетін жұмыс істемейтін адамдар; атаулы әлеуметтік көмек алатын жұмыс істемейтін адамдар; ресми тіркелген жұмыссыздар. Толық тізім — ӘМСҚ сайтында.
2026 жылы қанша төлеу керек
| Кім | Қанша |
|---|---|
| Жалдамалы жұмыскер | жалақының 2 {a7e525879c14f21a20be54522f8e63fb87b00f55195136d0f7a5521f4b12f332}-ы (жұмыс беруші ұстап қалады) |
| Жұмыс беруші | жұмыскер жалақысының 3 {a7e525879c14f21a20be54522f8e63fb87b00f55195136d0f7a5521f4b12f332}-ы |
| Жеке кәсіпкер, шаруа қожалығы, жеке практика | айына 5 950 ₸ |
| Жұмыс істемейтін және жеңілдікті санатқа жатпайтын адам (өз бетінше) | айына 4 250 ₸ |
«Сақтандырылған» мәртебесі 12 ай үздіксіз төлемнен кейін беріледі; жетпейтін айларды өткен кезең үшін төлеуге болады. Соманы есептеу — ӘМСҚ калькуляторы, төлеу — ӘМСҚ сайтында немесе банкте.
Мәртебеңіз болмаса
ТМККК аясындағы көмекті кез келген жағдайда аласыз: жедел және шұғыл көмек, бекітілген емханада учаскелік дәрігердің қабылдауы, екпелер, скринингтер. Сақтандыру болмаса, МӘМС-ке кіретін көмек (бейінді маманның кеңесі, жоспарлы тексеру, жоспарлы емдеуге жатқызу) ақылы болуы мүмкін.
Жиі қойылатын сұрақтар
Пациенттерге
Учаскелік дәрігерге бару үшін МӘМС мәртебесі керек пе?
Жоқ. Учаскелік дәрігердің немесе жалпы практика дәрігерінің қабылдауы мәртебеге қарамастан көрсетіледі. Мәртебе МӘМС пакетіндегі көмекке керек: бейінді мамандардың кеңесі, диагностика, жоспарлы емдеуге жатқызу, оңалту.
Тар маманға қалай баруға болады?
Әдетте — учаскелік дәрігердің жолдамасы бойынша. Жолдамасыз тікелей баруға болатын жағдайлар: шұғыл жағдайлар мен жарақаттар, стоматология, дерматовенеролог, бекітілген жердегі акушер-гинеколог пен психолог, онкологиялық ауруға күдік, маман тағайындаған қайталама қабылдау.
Ауруханаға жоспарлы түрде қалай жатуға болады?
Бекітілген емхананың дәрігеріне жүгініңіз. Көрсетілімдер болса, дәрігер тексеру тағайындайды және Емдеуге жатқызу бюросының порталы арқылы жолдама береді. Медициналық ұйымды таңдауға құқығыңыз бар. Жатқызу күнін порталдан білуге болады.
Жұмыс істемеймін және жұмыссыз ретінде тіркелмегенмін. Не істеу керек?
Жарнаны өзіңіз төлей аласыз: 2026 жылы айына 4 250 ₸. «Сақтандырылған» мәртебесі 12 ай үздіксіз төлем болғанда беріледі (өткен немесе алдағы айлар үшін).
Төледім. Мәртебе қашан жаңарады?
Төлем 3 жұмыс күні ішінде түседі, содан кейін мәртебе автоматты түрде жаңарады.
Неге мен сақтандырылмағанмын?
Себебін Qoldau 24/7 қосымшасынан, ӘМСҚ сайтындағы МӘМС-гидтен немесе Бірыңғай байланыс орталығынан 1414 білуге болады. Жарна төленбесе, мәртебе тоқтатылуы мүмкін.
Жұмыс берушілерге
Жұмыскер үшін қанша төлеу керек?
Аударымдар — жалақының 3 {a7e525879c14f21a20be54522f8e63fb87b00f55195136d0f7a5521f4b12f332}-ы жұмыс берушінің өз қаражатынан (2026 жылы ең көбі 102 000 ₸, ТМК 121). Жарналар — жалақының 2 {a7e525879c14f21a20be54522f8e63fb87b00f55195136d0f7a5521f4b12f332}-ы, жұмыскердің жалақысынан ұсталады (ең көбі 34 000 ₸, ТМК 122).
Кімдер үшін жарна ұсталмайды?
Жұмыс орнынан балалар, зейнеткерлер, мүгедектігі бар адамдар, студенттер, «Алтын алқа» және «Күміс алқа» алқаларымен марапатталғандар үшін жарна төленбейді: олар үшін мемлекет төлейді.
Азаматтық-құқықтық шарт бойынша жұмыс істейтіндер ше?
Салық агенттері жұмыс немесе қызмет көрсету үшін жалданған адамдар үшін жарнаны жұмыскерлер үшін сияқты тәртіппен аударады.
Шағын бизнес бірыңғай төлем төлесе?
2026 жылы бірыңғай төлем — есептелген табыстың 24,8 {a7e525879c14f21a20be54522f8e63fb87b00f55195136d0f7a5521f4b12f332}-ы. Оған МӘМС жарналары мен аударымдары да кіреді.
Толығырақ — ӘМСҚ сайтында: кім және қанша төлейді, МӘМС-гид.
Қайда жүгіну керек
- Біздің аурухана бойынша сұрақтар — Пациенттерді қолдау қызметі.
- Мәртебе мен жарналар туралы — Бірыңғай байланыс орталығы 1414 немесе ӘМСҚ-ға өтініш.
- Тегін дәрі-дәрмек (АДҚ), профилактикалық тексерулер күнтізбесі.
- Пациенттің құқықтары.
msqory.kz және adilet.zan.kz сайттарымен 12.10.2026 салыстырылды.
