Қысқаша
- Дәрігерді және емхананы таңдауға немесе ауыстыруға болады (шұғыл көмектен басқа).
- Дәрігер диагнозды, емдеу жоспарын, тәуекелдер мен басқа нұсқаларды түсінікті етіп айтуы тиіс. Тәуелсіз пікір мен консилиум сұрауға болады.
- Медициналық көмек сіздің келісіміңізбен көрсетіледі. Емделуден бас тартсаңыз, дәрігер оның салдарын түсіндіруі тиіс.
- Тексеру мен емшаралар кезінде студенттер мен бөгде адамдардың қатысуынан бас тартуға болады.
- Денсаулығыңыз туралы ақпаратты кімге хабарлау керектігін өзіңіз тағайындай аласыз.
- Көмек кезегі тек медициналық көрсетілімдер бойынша анықталады.
Құқығыңыз бұзылса
- Аурухананың Пациенттерді қолдау қызметі.
- Жазбаша шағым — сайттағы форма немесе eotinish.kz. Жауап беру мерзімдері — «Өтініштерді қарау мерзімдері».
- Сақтандыру және төлем мәселелері — Бірыңғай байланыс орталығы 1414 немесе ӘМСҚ-ға өтініш.
- Алматы облысының денсаулық сақтау басқармасы.
Заң мәтіні
«Халық денсаулығы және денсаулық сақтау жүйесі туралы» Қазақстан Республикасының 2020 жылғы 7 шілдедегі № 360-VI ҚРЗ Кодексі.
134-бап. Пациенттердің құқықтары
1. Пациенттің осы Кодекстің 12-тарауында көрсетілген құқықтардан басқа:
1) профилактика, диагностика, емдеу процесінде өзіне лайықты қарауына, өзінің мәдени және жеке басының құндылықтарына құрмет көрсетілуіне;
2) қандай да бір кемсітушілік факторларының ықпалынсыз, тек қана медициналық өлшемшарттар негізінде айқындалатын кезектілікпен медициналық көмекке;
3) шұғыл және кезек күттірмейтін көмек көрсету жағдайларын қоспағанда, тегін медициналық көмектің кепілдік берілген көлемі шеңберінде және (немесе) міндетті әлеуметтік медициналық сақтандыру жүйесінде дәрігерді немесе медициналық көмек ұсынатын медициналық ұйымды таңдауға, ауыстыруға;
4) медициналық ұйымда аудио-, және (немесе) бейнебайқау және жазба жүргізілетіндігі туралы құлақтандырылуына;
5) медициналық технологиялардың қолда бар деңгейінің қаншалықты мүмкіндігі болса, сондай шамада дерт азабының жеңілдетілуіне;
6) өз денсаулығының жай-күйі туралы ақпарат (пациентке қолжетімді нысанда ұсынылатын және балама емдеу әдістерінің ықтимал тәуекелі мен артықшылықтары туралы деректер, емделуден бас тартудың ықтимал салдары туралы мәліметтер, диагноз, емдік іс-шаралардың болжамы мен жоспары туралы ақпарат, сондай-ақ оны үйіне шығару немесе басқа медициналық ұйымға ауыстыру себептерінің түсіндірмесі) және тәуелсіз пікір алуға және консилиум өткізілуіне;
7) көру және (немесе) есту қабілеттері бұзылған адамдар үшін қолжетімділік ескеріле отырып, өз құқықтары мен міндеттері, көрсетілетін қызметтер, ақылы көрсетілетін қызметтердің құны және бірлесіп төлеу мөлшері, олардың ұсынылу тәртібі; тағайындалатын дәрілік зат; өзіне медициналық қызметтер көрсететін медицина қызметкерлері туралы ақпаратты алуға;
8) оқу процесіне қатысудан, сондай-ақ емдік-диагностикалық емшаралардың жүргізілуі кезінде үшінші тұлғалардың қатысуынан бас тартуға құқығы;
9) Қазақстан Республикасының заңдарында көзделген өзге де құқықтары бар.
2. Пациенттің құқықтары туралы ақпарат медициналық ұйымдардың көрнекі үгіт орналасатын жерлерінде орналастырылады.
3. Медициналық көмек медициналық көмек алуға пациенттің хабардар етілген келісімі алынғаннан кейін ұсынылады. Инвазиялық араласулар кезінде пациенттің хабардар етілген келісімі уәкілетті орган бекіткен нысан бойынша жасалады.
4. Пациент өз денсаулығының жай-күйі туралы ақпаратты хабарлау қажет болатын адамды тағайындай алады. Денсаулығының жай-күйі туралы ақпарат пациенттен оның денсаулығының жай-күйі ескеріле отырып, жасырылуы және пациенттің жұбайына (зайыбына), оның жақын туыстарына немесе заңды өкілдеріне хабарлануы мүмкін.
5. Пациенттердің құқықтарын қорғауды мемлекеттік органдар, денсаулық сақтау ұйымдары, қоғамдық бірлестіктер өз құзыреті шегінде жүзеге асырады.
Пациенттердің міндеттері — 135-бап.
Құжаттар
- «Халық денсаулығы және денсаулық сақтау жүйесі туралы» Кодекс
- «Міндетті әлеуметтік медициналық сақтандыру туралы» Заң
- Тегін медициналық көмектің кепілдік берілген көлемінің тізбесі (ҚР Үкіметінің 2020 жылғы 16 қазандағы № 672 қаулысы)
- МӘМС жүйесіндегі медициналық көмектің тізбесі
- 2026–2028 жылдарға арналған ТМККК және МӘМС аясында медициналық көмек көрсету кепілдіктерінің бағдарламасы (ҚР Үкіметінің 2025 жылғы 9 қазандағы № 840 қаулысы)
Заң мәтіні adilet.zan.kz сайтымен 12.10.2026 салыстырылды.
